طريقة عمل البشاميل الجوسي.. سر الطراوة والنكهة الشهية أحلى من المحلات

البشاميل من الأطباق اللي ليها مكانة خاصة في كل بيت عربي بس لو عايزة تعملي بشاميل مختلف تمامًا كريميو ناعم وجوسي بمعنى الكلمة السر مش بس في المقادير لكن في طريقة الطبخ اللي بتديكي نتيجة مذهلة مثل أفخم المطاعم، هتعرفي خطوة بخطوة طريقة عمل البشاميل الجوسي اللي يخلي مكرونتك دايبة وغنية ومليانة نكهة عبر المقال.

طريقة عمل البشاميل الجوسي

ترغب الكثيرمن السيدات في معرفة طريقة عمل البشاميل الجوسي الأطعم من المحلات فدعونا نتعرف عليها فيما يلي:

المكونات الأساسية لصوص البشاميل الجوسي

• 4 ملاعق كبيرة زبدة (أو سمنة حسب الرغبة).
• 4 ملاعق كبيرة دقيق أبيض.
• 1 لتر حليب دافئ (كامل الدسم).
• ½ كوب كريمة طبخ (للقوام الجوسي الكريمي).
• رشة جوزة الطيب.
• ملح وفلفل أبيض حسب الذوق.
• مكعب مرقة دجاج اختياري بس بيحلي الطعم.

طريقة التحضير خطوة بخطوة

• في حلة على نار متوسطة ذوبي الزبدة لحد ما تبقى سايحة تمامًا بس من غير ما تتحرق.
• ضيفي الدقيق تدريجيًا وقلبي بسرعة بمضرب يدوي أو ملعقة خشب عشان ما يعملش كتل لازم القوام يبقى ناعم.
• استمري في التقليب لحد ما الخليط يبقى لونه دهبي.
• ضيفي الحليب ببطء وأنتي بتقلبي باستمرار بمضرب سلك عشان تحافظي على القوام الناعم.
• هنا بقى نضيف كريمة الطبخ ونقلبها كويس الكريمة هتخلي البشاميل غني وطري ومش بيشد أو ينشف بعد ما يدخل الفرن.
• ضيفي رشة جوزة الطيب وملح و فلفل أبيض أو أسود، ولو حابة طعم أغنى حطي مكعب مرقة دجاج ودوبيه كويس.
• استمري في التقليب لحد ما القوام يبقى كريمي وسميك بس مش تقيل بزيادة وبمجرد ما يبدأ يعمل “فقاقيع” يبقى وصل للقوام المثالي.

نصائح ذهبية عند عمل البشاميل

• دايمًا استخدمي حليب دافئ مش بارد عشان ما يتكتلش.
• قلبي على طول بمضرب سلك أو ملعقة خشب.
• لو الصوص تقيل زودي شوية حليب أو كريمة.
• لو عايزة بشاميل غني قوي للضيوف زودي معلقة جبنة بارميزان في الآخر.

طريقة عمل مكرونة بشاميل باللحمة

إليكم طريقة عمل مكرونة بشاميل باللحمة فيما يلي:

المكونات

• ½ كيس مكرونة قلم.
• ماء و ملح و نقطة زيت لسلق المكرونة.
• ½ كيلو لحمة مفرومة.
• 1 بصلة مفرومة.
• 2 ملعقة كبيرة زيت أو سمنة.
• ملح و فلفل أسود.
• ¼ ملعقة صغيرة قرفة (اختياري).
• ¼ ملعقة صغيرة بهارات لحمة.
• 2 ملعقة كبيرة صلصة طماطم.

طريقة التحضير

• في قدر كبير ضيفي ماء مع رشة ملح ونقطة زيت.
• لما يغلي الماء ضيفي المكرونة واسلقيها.
• صفيها واشطفيها بماء بارد وسيبيها على جنب.
• في طاسة سخنة ضيفي الزيت وشوحي البصل لحد ما يصفر.
• ضيفي اللحمة وقلبي كويس لحد ما لونها يغمق.
• ضيفي الملح والفلفل والبهارات والقرفة وصلصة الطماطم.
• سبكي الخليط 10 دقائق وسيبيه يبرد شوية.
• في صينية بايركس حطي طبقة خفيفة من البشاميل بعد إعداده بالطريقة الموضحة بالأعلى.
• ضيفي نصف كمية المكرونة ووزعيها كويس.
• افردي اللحمة المفرومة فوقها بالتساوي.
• ضيفي باقي المكرونة وبعدين غطي الكل بالبشاميل.
• ممكن ترشي جبنة موتزاريلا أو رومي على الوجه (اختياري).
• سخني الفرن على 200 درجة.
• دخلي الصينية في الرف الأوسط من 25 إلى 30 دقيقة.
• شغلي الشواية آخر 5 دقائق لو تحبي الوجه يتحمر.